Жамбыл облыстық психикалық денсаулық орталығының мәжіліс залында 12 мамыр-Халықаралық мейіргерлер күніне орай жиын өтті.Жиында Орталықтың бас дәрігері Жетібаев Серік Дүйсенәліұлы осынау ізгі жандардың науқастарды емдеуде, оларды ауруынан айықтыру жолындағы еңбектері жайлы айтып, адамзаттың дертіне дауа, көңіліне демеу бола білген, күндіз-түні адам жанының арашашысы болып жүрген ізгілікті маман иелерін айтулы мерекемен құттықтады.

Медицина саласына айтарлықтай үлес қосқан орталықтың бірқатар қызметкерлерін Алғыс хатпен марапаттап, естелік сыйлықтар табыс етілді.

Сонымен қатар «Психикалық денсаулық бойынша заманауи көзқарас» республикалық ғылыми – тәжірибелік конференциясының аясында өткізілген психикалық денсаулық орталықтарының медицина қызметкерлері арасындағы “Волейбол” спорт түрінен өткен Республикалық спартакиадасында II-орын иеленген команда мүшелерін жеңістерімен құттықтап,ізгі лебізін жеткізді.

Барша орта буын қызметкерлерін кәсіби мерекесімен құттықтай отырып, қоғамға аса қажет игілікті еңбектеріңіздің жануын және мықты денсаулық, жұмыста өркендеу және табыс тілейміз!